أحمد سالم (مصرفي)

في كتابه 200 فكرة، بيحكي مصطفى أمين عن اغرب سبب اقالة شافه في حياته، بيقول ان الاقتصادي طلعت حرب، وهو مؤسس الاقتصاد المصري وبنك مصر، راجل عبقري، ويقدر يحول التراب لدهب حرفيا، طلعت حرب، حط ثقته كلها في أحمد سالم، وأحمد سالم دا فلتة من فلتات عصره. يعني أحمد سالم هو أول شاب مصري يسوق طيارة، اول واحد يتكلم في الإذاعة ويقول هنا القاهرة اللي بقت ماركة مسجلة باسمه، اتجوز احلى بنات في مصر، اتجوز كاميليا ومديحة يسرى، أسمهان، وتحية كاريوكا وأمينة البارودي. وكان رئيس استديو مصر والمشرف على إنتاجه، وكان ممثل ومؤلف ومخرج ومنتج، وتقريبا عمل كل حاجة، ، وكل دا وهو لسه شاب صغير في ريعان شبابه. وكان بيقبض من طلعت حرب أعلى مرتب لموظف في مصر وقتها، يعني تقدر تقول انه كان أغنى شاب في مصر، فطبعا الغيرانين كتروا، واللي يقول لطلعت حرب دا فيه دا عليه دا نسوانجي، دا بتاع سهرات، لكن طلعت حرب كان رافض تماما يصدق عليه أي حاجة. وفي يوم، كان طلعت حرب مريض، في بيته في حلوان، وراح احمد سالم، يسأل عنه، وقاله طلعت حرب: "أرجوك يا أحمد أن تحضر معك بكرا الصبح طبق فول مدمس من محل التابعي" ودا اشهر محل فول في مصر وقتها، فأحمد سالم، قاله من عيني يا طلعت بيك..... راح احمد سالم الشغل، وسهر بالليل سهرة حلوة وروح نام، وطبعا صحي الصبح نسي موضوع طبق الفول خالص، فراح لطلعت حرب، فين يا احمد افندي الفول، قاله، انا روحت الصبح لمحل التابعي، لقيته مقفول اصل أخوه مات، فطلعت حرف سكت ومقالش أي حاجة... تمام.. تمام.

مشي احمد سالم من هنا، وطلعت حرب نده عليهم يحضروله العربية، وقال للسواق اطلع ع التابعي، طلع عالتابعي، قعد وجاله الفطار، وجه الحاج التابعي بنفسه يسلم على طلعت حرب، فطلعت حرب، قاله البقاء لله في اخوك يا حاج تابعي.. فقاله 1بس انا اخويا مماتش، قاله ولا قفلت المحل بتاعك.. قاله ولا قفلت المحل بتاعي.. فطلعت باشا حرب، طلع على مكتبه في بنك مصر وأصدر قراراً بفصل أحمد سالم من جميع مناصبه في الشركات والمؤسسات التابعة لبنك مصر. ولما سأله مصطفى أمين، قاله يعني انت جاتك كل الوشايات على أحمد سالم انه نسوانجي وانه بتاع سهرات وانه وانه وطردته علشان طبق فول، فقاله : "الرجل الذي يكذب علي في طبق الفول المدمس، سيكذب علي في مليون جنيه. إن هذه وظائف ثقة وما دام قد فقد ثقتي فهو لا يصلح للعمل معي". فكان طبق الفول المدمس من عند التابعي، سبب في ضياع راتب أغنى شاب في مصر.